കൊടുമൺ സമ്പൂർണ്ണ തരിശുരഹിത പഞ്ചായത്താണ്. കൃഷിക്കാർക്കു താൽപ്പര്യമില്ലെങ്കിൽ ഫാർമേഴ്സ് സൊസൈറ്റി തന്നെ ഭൂമി ഏറ്റെടുത്തു കൃഷി ചെയ്യും. കഴിഞ്ഞ വർഷം 500 ടൺ ആണ് നെല്ല് ഉൽപ്പാദനം. ഇതിൻ്റെ പകുതി ഫാർമേഴ്സ് സൈാസൈറ്റി നേരിട്ടു സംഭരിച്ച് കൊടുമൺ റൈസ് ബ്രാൻഡിൽ വിൽക്കുന്നു. സൊസൈറ്റി സംഭരിക്കുന്നതിനോട് എല്ലാവർക്കും യോജിപ്പാണ്. കാരണം സംഭരണം കഴിഞ്ഞാൽ പിറ്റേന്ന് പണം അക്കൗണ്ടിൽ എത്തും. ഇതിനൊരു ഓവർഡ്രാഫ്റ്റ് സൗകര്യം കേരള ബാങ്ക് നൽകിയിട്ടുണ്ട്. സമ്പൂർണ്ണ സംഭരണത്തിനുള്ള പ്രതിബന്ധം കൊടുമൺ റൈസിനുള്ള വിപണി ഇപ്പോൾ 100 ടണ്ണോളമേ വരുകയുള്ളൂ എന്നുള്ളതാണ്. അതുകൊണ്ട് വലിയ കൃഷിക്കാരിൽ നിന്ന് സംഭരണത്തിന് സൊസൈറ്റി തൽക്കാലം പരിധി നിശ്ചയിച്ചിട്ടുണ്ട്.

സംഭരണത്തിൻ്റെ ഒരു കണ്ടീഷൻ ജൈവ കീടനാശിനികളേ പാടുള്ളൂ എന്നുള്ളതാണ് . ഉത്തമ കൃഷി മാതൃകകൾ പാലിക്കണം. അതുകൊണ്ട് തന്നെ കൊടുമൺ റൈസിന് ആവശ്യക്കാർ കൂടുന്നുണ്ട്. എക്കോ ഷോപ്പിൽ പഞ്ചായത്തിലെ പച്ചക്കറികളും ലഭ്യമാണ്. വെളുത്തുള്ളി കാന്തല്ലൂരിൽ നിന്നും ഉള്ളി, ഉരുളക്കിഴങ്ങ് തുടങ്ങിയവ വട്ടവടയിൽ നിന്നുമാണ് വരുന്നത്. സൊസൈറ്റിയുടെ സെക്രട്ടറി വിനിൽ ജൈവ കർഷകനാണ്. വട്ടവടയിലും കാന്തല്ലൂരുമെല്ലാം കൃഷിയുമുണ്ട്. അതുകൊണ്ടു പുറത്തു നിന്നുള്ള പച്ചക്കറിയുമെല്ലാം ജൈവം തന്നെയാണെന്ന് ഉറപ്പു വരുത്തുവാൻ കഴിയുന്നു.