ശ്യാം സരസ്വതി

ന്യൂഡൽഹി: കുട്ടികളുടെ ആധാർ കാർഡിലെ നിർബന്ധിത ബയോമെട്രിക് വിവരങ്ങൾ സൗജന്യമായി അപ്ഡേറ്റ് ചെയ്യാനുള്ള സമയപരിധി **സെപ്റ്റംബർ 30 വരെ**. 5 വയസ്സിലും 15 വയസ്സിലും കുട്ടികളുടെ ആധാറിൽ ബയോമെട്രിക് വിവരങ്ങൾ നിർബന്ധമായും അപ്ഡേറ്റ് ചെയ്യണം. 5 വയസ്സ് വരെ കുട്ടികൾക്ക് ബയോമെട്രിക് വിവരങ്ങൾ ആവശ്യമില്ല. രക്ഷിതാക്കളിൽ ഒരാളുടെ ആധാറുമായി ബന്ധിപ്പിച്ചാണ് ഈ കാലയളവിൽ കുട്ടിയുടെ ആധാർ നൽകുന്നത്. എന്നാൽ കുട്ടിക്ക് 5 വയസ്സ് പൂർത്തിയാകുമ്പോൾ ആദ്യ ബയോമെട്രിക് അപ്ഡേറ്റ് നടത്തണം.

ഈ ഘട്ടത്തിൽ കുട്ടിയുടെ വിരലടയാളം, ഐറിസ് സ്കാൻ, പുതിയ ഫോട്ടോ എന്നിവ ആധാർ ഡാറ്റാബേസിൽ ചേർക്കും. തുടർന്ന് 15 വയസ്സ് പൂർത്തിയാകുമ്പോൾ വീണ്ടും ബയോമെട്രിക് വിവരങ്ങൾ അപ്ഡേറ്റ് ചെയ്യണം. കുട്ടികൾ വളരുന്നതിനനുസരിച്ച് ശരീരത്തിലെ മാറ്റങ്ങൾ, പ്രത്യേകിച്ച് വിരലടയാളങ്ങളിലെ മാറ്റങ്ങൾ കണക്കിലെടുത്താണ് ഈ അപ്ഡേറ്റുകൾ നിർബന്ധമാക്കിയിരിക്കുന്നത്. കൃത്യസമയത്ത് വിവരങ്ങൾ പുതുക്കാത്തത് ആധാർ ഉപയോഗിച്ചുള്ള വിവിധ സേവനങ്ങളിൽ ബുദ്ധിമുട്ടുകൾക്ക് ഇടയാക്കാൻ സാധ്യതയുണ്ട്.

സെപ്റ്റംബർ 30 വരെ 5 വയസ്സിലും 15 വയസ്സിലും ചെയ്യേണ്ട നിർബന്ധിത ബയോമെട്രിക് അപ്ഡേറ്റ് സൗജന്യമാണ്. അതിന് ശേഷം സാധാരണയായി 125 രൂപ ഫീസ് നൽകേണ്ടിവരും. എന്നാൽ ആദ്യമായി ബയോമെട്രിക് വിവരങ്ങൾ അപ്ഡേറ്റ് ചെയ്യുന്ന കുട്ടികളിൽ നിന്ന് സെപ്റ്റംബർ 30ന് ശേഷവും ഫീസ് ഈടാക്കില്ലെന്നും റിപ്പോർട്ടിൽ പറയുന്നു. ബയോമെട്രിക് അപ്ഡേറ്റിനായി കുട്ടിയുമായി അടുത്തുള്ള ആധാർ എൻറോൾമെന്റ് സെന്ററിൽ എത്തണം. രക്ഷിതാവിന്റെ ആധാർ കാർഡ്, കുട്ടിയുടെ ജനന സർട്ടിഫിക്കറ്റ്, മേൽവിലാസ രേഖ, റേഷൻ കാർഡ്, കുട്ടിയുടെ രണ്ട് പാസ്പോർട്ട് സൈസ് ഫോട്ടോകൾ എന്നിവ കൈയിൽ കരുതണമെന്ന് നിർദേശമുണ്ട്. 2018ലാണ് യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI) കുട്ടികൾക്കായി പ്രത്യേകം നീല നിറത്തിലുള്ള 'ബാൽ ആധാർ' കാർഡ് അവതരിപ്പിച്ചത്. ആധാർ ആക്ട് 2016ലെ സെക്ഷൻ 3(1) പ്രകാരം കുട്ടികൾ ഉൾപ്പെടെ എല്ലാ താമസക്കാർക്കും ആധാർ നമ്പർ ലഭിക്കാൻ അർഹതയുണ്ട്.