ശ്യാം സരസ്വതി

ന്യൂഡൽഹി: സ്ഥിരനിക്ഷേപം (FD) തിരഞ്ഞെടുക്കുന്നവർക്ക് കൂടുതൽ സുതാര്യത ഉറപ്പാക്കുന്ന നിർണായക മാറ്റങ്ങളുമായി റിസർവ് ബാങ്ക് ഓഫ് ഇന്ത്യ (RBI). ഒക്ടോബർ 1 മുതൽ ബാങ്കുകളുടെ സ്ഥിരനിക്ഷേപ പലിശ നിരക്കുമായി ബന്ധപ്പെട്ട് പുതിയ വ്യവസ്ഥകൾ പ്രാബല്യത്തിൽ വരും. ഇതോടെ മികച്ച പലിശനിരക്ക് തേടി വിവിധ ബാങ്ക് ശാഖകൾ കയറിയിറങ്ങേണ്ട സാഹചര്യം ഒഴിവാകുമെന്നാണ് വിലയിരുത്തൽ.

ഒരേ ബാങ്കിൽ ഒരേ നിരക്ക്

പുതിയ വ്യവസ്ഥകൾ പ്രകാരം, ഒരു ബാങ്കിന്റെ വിവിധ ശാഖകളിൽ ഒരേ ദിവസം, ഒരേ തുക, ഒരേ കാലയളവ് എന്നിവയ്ക്ക് സ്ഥിരനിക്ഷേപം ആരംഭിച്ചാൽ ബാധകമായ പലിശനിരക്ക് ഒന്നായിരിക്കും. ശാഖകൾക്കനുസരിച്ച് വ്യത്യസ്ത നിരക്കുകൾ ലഭിക്കുന്ന രീതിക്ക് ഇതോടെ മാറ്റമുണ്ടാകും. സ്ഥിരനിക്ഷേപങ്ങളുടെ പലിശനിരക്കുകൾ ബാങ്കുകൾ അവരുടെ ഔദ്യോഗിക വെബ്സൈറ്റിൽ വ്യക്തമായി പ്രസിദ്ധീകരിക്കണമെന്നും ആർബിഐ നിർദേശിച്ചിട്ടുണ്ട്.

വലിയ നിക്ഷേപങ്ങൾ

3 കോടി രൂപയോ അതിൽ കൂടുതലോ ഉള്ള നിക്ഷേപങ്ങൾക്ക്ബാ ധകമായ പലിശനിരക്കുകളും ബാങ്കുകൾ ദിവസേന വെബ്സൈറ്റിൽ പ്രസിദ്ധീകരിക്കണം. അന്നത്തെ നിരക്കുകൾ രാവിലെ 10 മണിക്ക് ലഭ്യമാക്കുകയും 10.10നകം വിവരങ്ങൾ അപ്ഡേറ്റ് ചെയ്യുകയും ചെയ്യണമെന്നാണ് നിർദേശം. ഇതോടെ വലിയ തുക നിക്ഷേപിക്കുന്നവർക്കും ബാങ്ക് ശാഖകളെ ആശ്രയിക്കാതെ നിലവിലെ പലിശനിരക്ക് പരിശോധിച്ച് തീരുമാനമെടുക്കാൻ സാധിക്കും.

നിലവിലുള്ള എഫ്ഡികൾക്ക് എന്ത് സംഭവിക്കും?

പുതിയ നിയമം നിലവിൽ വരുന്നതിന്റെ പേരിൽ നിലവിലുള്ള സ്ഥിരനിക്ഷേപങ്ങളുടെ പലിശനിരക്ക് മാറില്ല. 2026 ഒക്ടോബർ 1ന് മുമ്പ് ആരംഭിച്ച എഫ്ഡികൾക്ക്, നിക്ഷേപം ആരംഭിച്ച സമയത്ത് നിശ്ചയിച്ച പലിശനിരക്ക് തന്നെയായിരിക്കും കാലാവധി പൂർത്തിയാകുന്നതുവരെ ബാധകമാകുക. അതേസമയം, ഒക്ടോബർ 1 മുതൽ ആരംഭിക്കുന്ന പുതിയ സ്ഥിരനിക്ഷേപങ്ങൾക്ക് പുതിയ വ്യവസ്ഥകൾ ബാധകമാകും.

പലിശനിരക്ക് കൂടുമോ കുറയുമോ?

പുതിയ നിയമങ്ങൾ പ്രാബല്യത്തിൽ വരുന്നതോടെ എഫ്ഡി പലിശനിരക്കുകൾ ഒറ്റയടിക്ക് ഉയരുകയോ താഴുകയോ ചെയ്യണമെന്നില്ല. വിപണിയിലെ സാഹചര്യങ്ങൾ, ബാങ്കുകളുടെ ഫണ്ട് ചെലവ് തുടങ്ങിയ ഘടകങ്ങൾ പരിഗണിച്ചായിരിക്കും ഓരോ ബാങ്കും പലിശനിരക്ക് നിശ്ചയിക്കുക. വാണിജ്യ ബാങ്കുകൾക്ക് പുറമെ സ്മോൾ ഫിനാൻസ് ബാങ്കുകൾ, പ്രാദേശിക ഗ്രാമീണ ബാങ്കുകൾ (RRBs), ലോക്കൽ ഏരിയ ബാങ്കുകൾ, പേയ്മെന്റ് ബാങ്കുകൾ, അർബൻ കോ-ഓപ്പറേറ്റീവ് ബാങ്കുകൾ** തുടങ്ങിയവയ്ക്കും പുതിയ വ്യവസ്ഥകൾ ബാധകമാണ്.

അതിനാൽ ഒക്ടോബർ 1 മുതൽ പുതിയ എഫ്ഡി ആരംഭിക്കാൻ ആലോചിക്കുന്നവർ ബാങ്കിന്റെ ഔദ്യോഗിക വെബ്സൈറ്റ് പരിശോധിച്ച് അന്നത്തെ പലിശനിരക്കും നിബന്ധനകളും മനസിലാക്കിയ ശേഷം നിക്ഷേപ തീരുമാനം എടുക്കുന്നത് കൂടുതൽ എളുപ്പമാകും.