ആര്‍ ബി ഐ നയ അവലോകന സമിതി പലിശ നിരക്കില്‍ മാറ്റം വരുത്തുമോ എന്നുള്ളത് രാജ്യത്തെ സാമ്പത്തിക വിദഗ്ധരും സാധാരണക്കാരും ഒരുപോലെ ഉറ്റുനോക്കുകയാണ്. ഇന്ധന വില റെക്കോർഡായ ലിറ്ററിന് 100 രൂപ പിന്നിട്ടിരിക്കുന്നു. പണപ്പെരുപ്പ നിരക്ക് ഉയർച്ചയിലാണ്. ഈ സാഹചര്യത്തിലാണ് ആര്‍ ബി ഐ യുടെ രണ്ട് മാസത്തിലൊരിക്കലുള്ള പണനയ അവലോകന റിപ്പോര്‍ട്ട് ജൂണ്‍ നാലിന് പുറത്ത് വരാനിരിക്കുന്നത്. ഏപ്രിലിലെ അവസാന  യോഗത്തിലും പലിശ നിരക്ക്  പുനഃപരിശോധിക്കാൻ  ആര്‍ബിഐ തയാറായില്ല. റിപ്പോ നിരക്ക് അന്ന് 4 ശതമാനമായും റിവേഴ്‌സ് റിപ്പോ നിരക്ക് 3.35 ശതമാനമായും നിലനിർത്തിയിരുന്നു. കോവിഡ് രണ്ടാം തരംഗത്തിന്റെ ആശയക്കുഴപ്പത്തിലാണ് സമ്പദ് വ്യവസ്ഥ. പ്രതിരോധ കുത്തിവെപ്പ്   എങ്ങുമെത്താത്തിടത്തോളം ആര്‍.ബി.ഐ നിർണ്ണായക നടപടികളിലേക്ക് പോകില്ല എന്നാണ് വിലയിരുത്തൽ.