മലപ്പുറം :ചുങ്കത്തറ സഹകരണ ബാങ്കിന്റെ നേതൃത്വത്തിൽ പ്രവർത്തിക്കുന്ന അത്യാധുനീക സാങ്കേതിക മികവിലുള്ള ടിഷ്യു കൾച്ചർ ലാബ് കാർഷിക മേഖലക്കും സഹകരണ മേഖലക്കും ഒരു പോലെ മുതൽക്കൂട്ടാണ്.ബാങ്കിന്റെ നേതൃത്വത്തിൽ  2019 ലാണ് ലാബ് പ്രവർത്തനമാരംഭിച്ചത്. ഏതൊരു സസ്യത്തിന്റെയും ഏതൊരു ഭാഗത്തു നിന്നും ഒരു പുതിയ സസ്യം ഉണ്ടാക്കാൻ സാധിക്കുo എന്നതും ,"അനുകൂല സാഹചര്യത്തിൽ അതിനെ പരിചരിക്കുകയാണെങ്കിൽ അതിൽ നിന്നും പുതിയ സസ്യം ഉണ്ടാകും" എന്നതു മാണ് ടിഷ്യു കൾച്ചറിന്റെ അടിസ്ഥാന തത്വം. നേന്ത്രൻ ,സ്വർണ്ണമുഖി ,,പൂവൻ , റോബസ്റ്റ ,ജി 9 ,ചെങ്കദളി  അലങ്കാര ചെടികൾ (ഓർക്കിഡ് ) എന്നീ  ഇനങ്ങളാണ് പ്രധാനമായുംചുങ്കത്തറ സഹകരണ ടിഷ്യു കൾച്ചർ ലാബിൽ ഉത്പാദിപ്പിക്കുന്നത്.നേന്ത്രനാണ്‌ കൂടുതൽ ആവശ്യക്കാർ എത്തുന്നത്.

ചുരുങ്ങിയ സമയം കൊണ്ട് മാതൃ സസ്യത്തിന്റെ അതേ സ്വഭാവഗുണങ്ങളോട് കൂടിയ രൂപത്തിലുള്ള ആയിരകണക്കിന് തൈകൾ ഉണ്ടാക്കിയെടുക്കാമെന്നുള്ളതാണ് ടിഷ്യു കൾച്ചറിന്റെ

പ്രധാന നേട്ടം.പ്രാദേശികമായ വില്പ്പനക്കൊപ്പം തന്നെ തിരുവനന്തപുരം ,എറണാകുളം ,കണ്ണൂർ ,ബാംഗ്ലൂർ ,തമിഴ്നാട് എന്നിവിടങ്ങളിലേക്കും വാഴകൾ വില്പന നടത്തുന്നുണ്ട്.  ഒരേ സമയം വിളവെടുപ്പ് നടത്താമെന്നതും, സാധാരണയിൽക്കവിഞ്ഞ തൂക്കം ലഭിക്കുന്നതും സാധാരണയെ അപേക്ഷിച്ച് 70 ശതമാനത്തോളം കീടാണുക്കളിൽ നിന്നും സുരക്ഷിതമായിരിക്കും എന്നീ ഗുണങ്ങളാണ്  ടിഷ്യു കൾച്ചറിനെ കൂടുതൽ ആകർഷകമാക്കുന്നത് ..

പൂർണ്ണമായും അണു വിമുക്തമാക്കിയാണ്  ലാബ് പ്രവർത്തിക്കുന്നത്. ലാബിനകത്തു  വിദഗ്ദരായ ആറ് ടെക്‌നീഷ്യന്മാർ ജോലി ചെയ്യുന്നുണ്ട് ഇവരുടെ നേതൃത്വത്തിൽ  ആണ് ഗുണമേന്മയുള്ള മികച്ച  തൈകൾ ഉത്പാദിപ്പിക്കുന്നത്.ഇതിനു പുറമെ  പ്രൈമറി ,സെക്കൻഡറി ഹാർഡനിങ്ങിനായി  എട്ട് പേരും പ്രവർത്തിക്കുന്നുണ്ട്. മലപ്പുറത്തും സമീപ  ജില്ലകളിലുമുള്ള  കൃഷി ഭവനുകളിലേക്ക് ഇവിടെ നിന്നും തൈകൾ വിതരണം ചെയ്യുന്നുണ്ട് .മറ്റ് സ്വകാര്യ സ്‌ഥാപനങ്ങളിലേക്കാൾ കുറഞ്ഞ വിലക്ക് തൈകൾ ലഭിക്കും എന്നതും കൂടുതൽ കർഷകരെ ഇവിടേക്ക് ആകർഷിക്കുന്നു.

സജീഷ് കെ .എസ്