ന്യൂഡൽഹി: കാർഡ് ഉപയോഗിക്കാതെ എ ടി എമ്മിൽ നിന്നും പണം പിൻവലിക്കാനുള്ള സംവിധാനം എല്ലാ ബാങ്കുകളിലും നടപ്പക്കാനൊരുങ്ങി ആർബിഐ. യു പി ഐ സംവിധാനത്തിലൂടെ പണം പിൻവലിക്കുന്ന രീതിയാണ് പരിഗണനയിലുള്ളത്. ചില ബാങ്കുകളിൽ കാർഡ് രഹിത പണം പിൻവലിക്കൽ നിലവിലുണ്ട്. ഇത് മറ്റെല്ലാ ബാങ്കുകളിലേക്കും വ്യാപിപ്പിക്കാനാണ് റിസർവ് ബാങ്കിന്റെ തീരുമാനം. ഇതുവഴി പണമിടപാടുകൾ വേഗത്തിൽ നടത്താനും എ ടി എം തട്ടിപ്പുകൾ തടയാനും സാധിക്കുമെന്നുമാണ് റിസർവ് ബാങ്കിന്റെ വിലയിരുത്തൽ. പണവായ്പ നയപ്രഖ്യാപനത്തിൽ സംസാരിക്കുകയായിരുന്ന റിസർ ബാങ്ക് ഗവർണർ ശക്തികാന്ത ദാസാണ് ഇക്കാര്യം അറിയിച്ചത്. എ ടി എം വഴി കാർഡില്ലാതെ പണമെടുക്കുമ്പോൾ യു പി ഐ വഴി ഉപയോക്താവിന്റെ അംഗീകാരം ഉറപ്പാക്കും. ഇതുസംബന്ധിച്ച് എൻപിസിഐ, എ ടി എം നെറ്റ് വർക്കുകൾ, ബാങ്കുകൾ എന്നിവയ്‌ക്ക് ഉടൻ നിർദ്ദേശം നൽകുമെന്നും അദ്ദേഹം അറിയിച്ചു. ഉപഭോക്താവിന്റെ കൈവശം ബാങ്കിൽ രജിസ്റ്റർ ചെയ്ത ഫോൺ നമ്പറുള്ള മൊബൈൽ ഫോൺ ഉണ്ടായിരിക്കണം. മൊബൈൽ ബാങ്കിംഗ് ആപ് ഉപയോഗിച്ചും സേവനം സാധ്യമാക്കാം. ഇത്തരത്തിൽ പ്രതിദിന ഇടപാടിന് പരിധി നിശ്ചയിച്ചിട്ടുണ്ട്. 5,000 മുതൽ 20,000 രൂപ വരെയാണ് കാർഡില്ലാതെ പിൻവലിക്കാനാവുക. ഓരോ ബാങ്കുകളിലും ഈ പരിധി വ്യത്യാസമായിരിക്കും.