ചെറുകിട കച്ചവടക്കാരെ പ്രളയം, കോവിഡ് ഉൾപ്പെടെയുള്ള പ്രതിസന്ധിഘട്ടങ്ങളിൽ സംരക്ഷിക്കാൻ കേരള ബാങ്കിന് കഴിഞ്ഞത് വലിയ നേട്ടമെന്ന് സഹകരണ- രജിസ്ട്രേഷൻ വകുപ്പ് മന്ത്രി വി.എൻ വാസവൻ പറഞ്ഞു. സഹകരണ എക്സ്പോ 2022 ന്റെ ഭാഗമായി മറൈൻ ഡ്രൈവിൽ നടത്തിയ പത്രസമ്മേളനത്തിൽ സംസാരിക്കുകയായിരുന്നു അദ്ദേഹം. കേരള ബാങ്കിനെ സംബന്ധിച്ച് പ്രതീക്ഷാ നിർഭരമായ സാഹചര്യമാണ് നിലവിലുള്ളത്. കേരളത്തിന്റെ വികസനത്തിനുള്ള സാമ്പത്തിക സ്രോതസ് കൂടിയാണ് കേരള ബാങ്ക്. മലപ്പുറം ജില്ലാ ബാങ്കും വൈകാതെ കേരളാ ബാങ്കിനോടൊപ്പം ചേരാനുള്ള സാഹചര്യമാണ് ഉള്ളതെന്നും മന്ത്രി പറഞ്ഞു. യുക്രൈനിൽ നിന്നും മടങ്ങിവന്ന വിദ്യാർത്ഥികൾക്ക് തുടർ പഠനത്തിന് അനുകൂലമായ നിലപാട് എടുക്കേണ്ടത് കേന്ദ്ര സർക്കാരാണെന്നും സാധ്യമായ സഹായങ്ങൾ നൽകുമെന്നും മന്ത്രി പറഞ്ഞു. സഹകരണ മേഖലയുടെ കരുത്ത് തെളിയിച്ച് കേരള ബാങ്ക് കഴിഞ്ഞ സാമ്പത്തിക വർഷത്തിൽ 5631.58 കോടിയുടെ അധിക വളർച്ച കൈവരിച്ചു. കോവിഡ് പ്രതിസന്ധി മറികടക്കാൻ കേരള ബാങ്ക് ആരംഭിച്ച 'ബി ദി നമ്പർ വൺ' ക്യാമ്പയിൻ വിജയകരമായതായും പത്രസമ്മേളനത്തിൽ അറിയിച്ചു. കേരള ബാങ്ക് ചെയർമാൻ ഗോപി കോട്ടമുറിക്കൽ, ചീഫ് എക്സിക്യൂട്ടീവ് ഓഫീസർ പി എസ് രാജൻ, ചീഫ് ജനറൽ മാനേജർ കെ.സി സഹദേവൻ എന്നിവർ പങ്കെടുത്തു.