മെയ് മാസത്തെ സാമൂഹിക സുരക്ഷാ പെൻഷൻ വിതരണം ചെയ്യുന്നതിനുള്ള ഉത്തരവ് വന്നതോടെ  സഹകരണ വകുപ്പ് ജീവനക്കാർ കടുത്ത ആശങ്കയിൽ. കോവിഡ് വ്യാപനം അതിരൂക്ഷമായി തുടർന്നുകൊണ്ടിരിക്കുന്ന സാഹചര്യത്തിൽ  വീടുകളിൽ നേരിട്ടെത്തിയുള്ള  പെൻഷൻ വിതരണം സ്ഥിതി കൂടുതൽ ഗുരുതരമാക്കുമെന്ന് ചൂണ്ടിക്കാണിക്കപ്പെടുന്നു. രണ്ടാം കോവിഡ് തരംഗത്തിൽ നിരവധി ജീവനക്കാർക്ക് രോഗം പിടിപെടുകയും പലരുടെയും നില ഗുരുതരമാവുകയും മരണത്തിനു കീഴടങ്ങുകയും ചെയ്യുന്ന  സാഹചര്യത്തിൽ വീടുകളിൽ പോയി പെൻഷൻ വിതരണം ചെയ്യാൻ ഭൂരിപക്ഷം ജീവനക്കാർക്കും എതിർപ്പാണുള്ളത്. പെൻഷൻ വിതരണം  ജീവനക്കാരുടെ മാത്രമല്ല, പെൻഷൻ വാങ്ങുന്ന 60 വയസ്സു കഴിഞ്ഞ മുതിർന്ന പൗരന്മാരുടെ ജീവനും അപകടത്തിലാക്കുമെന്നും ഇവർ മുന്നറിയിപ്പ് നൽകുന്നു. സമൂഹവുമായി നിരന്തരം ഇടപെട്ടുകൊണ്ടിരിക്കുന്ന സഹകരണ വകുപ്പ് ജീവനക്കാരെ വാക്സിൻ മുൻഗണനാ പട്ടികയിൽ ഉൾപ്പെടുത്തണമെന്ന ആവശ്യത്തിനും  സർക്കാരിന്റെ ഭാഗത്തുനിന്ന് ഇതുവരെ നടപടികളൊന്നുമുണ്ടായിട്ടില്ല. ബാങ്ക് ജീവനക്കാരെ മുൻഗണനാ വിഭാഗത്തിൽ ഉൾപ്പെടുത്തിയതായി മുഖ്യമന്ത്രി പറഞ്ഞുവെങ്കിലും അടുത്തിടെ പുറത്തിറക്കിയ 11 വിഭാഗങ്ങളെ ഉൾപ്പെടുത്തിക്കൊണ്ടുള്ള  മുൻഗണനാ ലിസ്റ്റിലും ബാങ്കിന്റെ  പേര് ഉൾപ്പെടുത്തിയിട്ടില്ല.